Sérsniðin veiðiskapur fyrir sportveiðimenn. Má veiða fimmtudaga, föstudaga, laugardaga og sunnudaga, aðra daga er bannað að veiða. Nær væri að snúa þessu akkúrat við þannig að bannað væri að veiða á þessum veiðidögum sem ofan greinir. Þessi vitleysa kemur mér ekki á óvart.

MBL FRÉTT 12 september 2007.

Þórunn Sveinbjarnardóttir, umhverfisráðherra, hefur ákveðið að rjúpnaveiðitímabilið í ár standi frá 1. til 30. nóvember en í fyrra var tímabilið frá 15. október til 30. nóvember. Mælt er með því að veiddir verði að hámarki 38.000 fuglar. Áfram mun ríkja sölubann á rjúpum og rjúpnaafurðum. Ákvörðunin byggir á mati Náttúrufræðistofnunar Íslands á veiðiþoli rjúpnastofnsins og mati Umhverfisstofnunar á heildarveiði árið 2006. Umhverfisráðuneytið segir, að rjúpum fækki nú annað árið í röð frá síðasta uppsveifluskeiði, en það stóð aðeins yfir í tvö ár samanborið við fjögur til fimm ár í fyrri uppsveiflum rjúpnastofnsins. Að mati Náttúrufræðistofnunar er áætlaður varpstofn nú um 110.000 fuglar og er það fækkun um 70.000 fugla frá því í fyrra.

Við mat á veiðiþoli er miðað við að hlutföll unga í veiðistofni verði 79%, það sama og talningar sýndu síðsumars 2007. Stærð veiðistofns 2007 er metin um 440.000 fuglar og með því mælt að ekki verði veiddir fleiri en 38.000 fuglar í ár.

Ráðuneytið segir, að miðað við fyrri reynslu af rjúpnastofninum í niðursveiflum, muni rjúpum fækka næstu þrjú til fjögur árin og veiðiþol stofnsins minnka að sama skapi. Það sé því ljóst að takmarka þarf rjúpnaveiði enn frekar í ár en gert hafi verið á síðustu árum.

Í ákvörðun umhverfisráðherra felst eftirfarandi:

• Veiðidagar verða alls 18 á tímabilinu 1. til 30. nóvember.
• Veiðar verða heimilaðar fimmtudaga, föstudaga, laugardaga og sunnudaga.
• Sölubann gildir áfram á rjúpu og rjúpnaafurðum.
• Áfram verður friðað fyrir veiði u.þ.b. 2600 ferkílómetra svæði á Suðvesturlandi.
• Veiðimenn verða sem fyrr hvattir til að stunda hófsamar og ábyrgar veiðar.
• Virkt eftirlit verður með veiðunum á landi og úr lofti eftir því sem kostur er.